i’ andêvne a la prêda
Nujêter, nâ in muntàgna, všîn a la Prêda,
apèna i’ êrne bûn ad caminâr
i’ andévne lì, per rinfursâr la fêda
e šmandâr un ajút particulâr.
Gli êrne ‘l màmi che, int al mêš ad Màš,
a la matîna prèst, in berluscûn,
s’ tgnîvne per mân e, a pê, per tút al viàš,
al s’insignêvne a dîr a-gli urasiûn.
Rivâ al Santuàri, in šnò-c, a ûn a ûn,
i’ arcmandêvne i parênt e la famìa.
I’ stêvne atênti d’ n’ a-scurdâr ansûn
mentre i sgranèvne quêrca Avemaria.
E dòp in fîla per la cunfesiûn,
la Mèsa, un bâš a Lê, una cansûn,
dû parôli al fra òrb, sedû lì dnâns,
po’ a la sêrca d’un post per fâr al prâns!
Ma, prìma d’arturnâr šù pr’al sintêr,
un salût a la Màma ch’ la sta lì,
e a pâr ch’ la dìga: “Fôrsa! I’ t’ho capî.
Curà-g! E tîra avânti, per piašêr!”,
menter l’alàta ‘l Pîn ch’al s’è girâ
e a pâr ch’a t’ guârda. E alûra, a l’impruvîš,
a t’ pâr d’èser pu’ ‘ršêl e rasignâ,
prûnt pr’afruntâr la vita cun ‘l surîš!
* * *
(Andavamo a Bimantova)
Noi, nati in montagna, vicino alla Pietra,
appena eravamo in grado di camminare,
andavamo lì per rinforzare la fede
e chiedere un aiuto particolare.
Erano le mamme che, nel mese di Maggio,
al mattino presto, alle prime luci,
ci tenevano per mano e, a piedi, per tutto il viaggio,
ci insegnavano a dire le orazioni.
Giunti al santuario, in ginocchio, ad uno ad uno
ricordavamo i parenti e tutta la famiglia.
Stavamo attenti di non dimenticare nessuno
mentre recitavamo qualche Avemaria.
E dopo in fila per la confessione,
la Messa, un bacio a Lei, una canzone,
due parole al frate cieco seduto lì davanti,
poi a cercare un posto per il pranzo.
Ma, prima di riprendere il sentiero,
un saluto alla Mamma che abita lì
e sembra dirti: “Forza! Ti ho capito.
Coraggio! E tira avanti, per piacere!"
Mentre allatta il bambino che si è girato
e sembra guardarti. Allora, all’improvviso,
ti sembra d’esser più leggero e rassegnato,
pronto ad affrontare l’esistenza con un sorriso!
(Savino Rabotti)
